പതിനാലാം വയസ്സിൽ പാർട്ടി കോൺഗ്രസ്സിൽ പ്രവർത്തനറിപ്പോർട്ട് അവതരിപ്പിച്ചുതുടങ്ങിയ രാഷ്ട്രീയജീവിതം 1990-കളിൽ യൂറോപ്പിൽ സോഷ്യലിസ്റ്റ് വാഴ്ച്ച തറപറ്റിയതോടെ താളം തെറ്റുകയായിരുന്നു. 1991-നു ശേഷമുള്ള ഒരു സംഭവവുംപുസ്തകത്തിലില്ല. ഈ തകർച്ചക്കുവഴിയൊരുക്കിയ ക്രൂഷ്ചേവ്, ബ്രഷ്നേവ്, ഗോർബച്ചേവ് എന്നിവർക്കെതിരെ പല്ലുഞെരിക്കുന്നതുമാത്രമാണ് പിന്നീട് നാം കാണുന്നത്. എന്നാൽ ഈ മഹാരഥന്മാരുടെ ഭരണകാലത്ത് സംഭവിച്ചുകൊണ്ടിരുന്ന പാളിച്ചകളുടെ വിശദവിവരങ്ങളൊന്നും ലേഖകൻ അന്ന് ചൂണ്ടിക്കാണിച്ചതുമില്ല. ഉത്തരവാദിത്വത്തിന്റെ ബാദ്ധ്യതകളില്ലാത്ത പച്ചയായ അധികാരം എന്നും ബെർലിൻ കുഞ്ഞനന്തൻനായരെ ലഹരി പിടിപ്പിച്ചിരുന്നു. 'അധികാരത്തിന്റെ ശക്തി!' എന്ന് മൂന്നുതവണ അദ്ദേഹം വിവിധ സംഭവങ്ങളെ അധികരിച്ച് ആശ്ചര്യപ്പെടുന്നുണ്ട്. ബെർലിനിൽ താമസത്തിനുവന്ന വി. കെ. കൃഷ്ണമേനോൻ തന്റെ മുഷിഞ്ഞ വസ്ത്രങ്ങൾ ഒന്നരാടം ദിവസങ്ങളിൽ വിമാനമാർഗ്ഗം മോസ്കോയിലയച്ചാണ് അലക്കി വൃത്തിയാക്കിയിരുന്നതെന്നതാണ് അതിലൊന്ന് (പേജ് 331). നമുക്കൊക്കെ ഓക്കാനമുണ്ടാക്കുന്ന ഈ അധികാരദുർവിനിയോഗത്തിൽ ധാർമികരോഷം കൊള്ളുന്നതിനുപകരം ഈ തോന്ന്യവാസം നടത്താൻ കൃഷ്ണമേനോനെ പ്രാപ്തനാക്കിയ അധികാരത്തിന് രതിമൂർച്ഛയോളമെത്തുന്ന ലഹരിയോടെ സ്തുതി പാടുകയാണ് ഗ്രന്ഥകാരൻ ചെയ്യുന്നത്.
1940-50 കാലഘട്ടങ്ങളിൽ ഇന്ത്യയിലെ കമ്യൂണിസ്റ്റ് പ്രസ്ഥാനത്തിന്റെ പ്രവർത്തനങ്ങൾ വിശദമായി നമുക്കീ കൃതിയിൽ വായിക്കാം. സ്വാതന്ത്ര്യാനന്തരം സായുധവിപ്ലവത്തിലൂടെ ഇന്ത്യയിൽ അധികാരത്തിലെത്താനുള്ള ശ്രമം, ഒളിവിലായിരുന്ന നേതാക്കളെ കൽക്കത്തയിൽനിന്ന് റഷ്യൻ മുങ്ങിക്കപ്പലിൽ സ്റ്റാലിൻ മോസ്കോയിലെത്തിച്ചത്, കമ്യൂണിസ്റ്റ് നേതാവായിരുന്ന എസ്. ഏ. ഡാങ്കെയുടെ വ്യക്തിപരവും സാമ്പത്തികവുമായ ക്രമക്കേടുകൾ എന്നിവയൊക്കെ വിശദമായിത്തന്നെ പുസ്തകത്തിൽ പൊളിച്ചെഴുതുന്നുണ്ട്.
പ്രത്യയശാസ്ത്രകടുംപിടിത്തങ്ങളുടേയും തദ്വാരാ വരട്ടുവാദത്തിന്റേയും മൂർത്തിമദ്ഭാവമാണ് ബെർലിൻ നായർ. സ്റ്റാലിന്റെ ഭരണകാലം ഭീകരവും നിർദാക്ഷിണ്യവുമായ അടിച്ചമർത്തലുകളുടെ പ്രഭവവേളയായിരുന്നുവെന്ന് ഇന്ന് ഏവരും സമ്മതിക്കും. എന്നാൽ ഗ്രന്ഥകാരൻ 'സ്റ്റാലിൻ എന്ന വിഗ്രഹം' എന്ന വിശേഷണമാണ് അദ്ദേഹത്തിന് ചാർത്തിക്കൊടുക്കുന്നത്. സ്റ്റാലിന്റെ കാലത്ത് ശക്തിപ്പെട്ട സോഷ്യലിസ്റ്റ് നിർമ്മാണപ്രക്രിയ റിവിഷനിസ്റ്റായ ക്രൂഷ്ചേവ് തടസ്സപ്പെടുത്തി. 'ക്രൂഷ്‌ചേവിന്റെ വിക്രിയകൾ' എന്ന ഒരദ്ധ്യായം തന്നെ കൊടുംവിമർശനത്തിനായി നീക്കിവെച്ചിരിക്കുന്നു. സ്റ്റാലിൻ ആരോടെങ്കിലും 'കടുംകൈ കാണിച്ചിട്ടുണ്ടെങ്കിൽ അത് രാഷ്ട്രത്തിനും പ്രസ്ഥാനത്തിനുമെതിരായി പ്രവർത്തിക്കുന്നവരോടു മാത്രമായിരുന്നത്രേ' (പേജ് 230)! റഷ്യയിലെ പേടിസ്വപ്നമായിരുന്ന രഹസ്യപ്പോലീസ് മേധാവി ബെറിയ ലേഖകന് 'ഉശിരാർന്ന കമ്യൂണിസ്റ്റ്' ആണ്. ബർലിൻ മതിൽ കെട്ടിയുയർത്തിയത് പശ്ചിമജർമനിയിൽ നിന്നുള്ള നുഴഞ്ഞുകയറ്റം തടയാനാണെന്നും, ചൈനയിലെ ടിയാനൻമെൻ ചത്വരത്തിലെ വിദ്യാർത്ഥികലാപം അമേരിക്കയിൽ ഉപരിപഠനം നടത്തിയ വിദ്യാർത്ഥികൾ സി.ഐ.എ-സഹായത്തോടെ ആസൂത്രണം ചെയ്തതാണെന്നുള്ള നിരീക്ഷണങ്ങൾ മാത്രം മതി ബർലിൻ നായരുടെ ബൗദ്ധികദാസ്യത്തിന്റെ ആഴം തിരിച്ചറിയാൻ!
ഗ്രന്ഥകാരൻ പത്രപ്രവർത്തകനായിരുന്നല്ലോ. ഒരു പത്രപ്രവർത്തകന് ഏറ്റവും പ്രധാനം 'സ്‌കൂപ്പ്' ആണ്. തന്റെ സ്‌കൂപ്പുകൾ എന്ന പേരിൽ നിരവധി കഥകൾ ഇതിൽ നിരത്തിവെക്കുന്നുണ്ട്. പോപ്പ് ജോൺ പോൾ ഒന്നാമന്റെ മരണം കൊലപാതകമായിരുന്നുവെന്നും, നെഹ്രു, ഇന്ദിരാഗാന്ധി, രാജീവ് ഗാന്ധി എന്നിവരെ വധിക്കാൻ സി.ഐ.എ ആസൂത്രണം ചെയ്തിരുന്നുവെന്നുമുള്ള റഷ്യൻ ചാരസംഘടനയായ കെജിബി പടച്ചുവിട്ട ചില അസത്യങ്ങളും അർദ്ധസത്യങ്ങളും മാത്രമാണിവയെന്ന് സൂക്ഷിച്ചുനോക്കിയാൽ ആർക്കും മനസ്സിലാകും. ബർലിൻ നായർ എഴുതിയതു മുഴുവൻ പ്രൊപ്പഗാണ്ട എന്നു വിശേഷിപ്പിക്കാവുന്ന ഗണത്തിൽ പെടുന്നവയാണ്.
പാർട്ടിയുടെ ഒളിവുകാലപ്രവർത്തനങ്ങളെക്കുറിച്ചും ആദ്യകാലരീതികളെക്കുറിച്ചും ഇതുവരെ പുറത്തുവന്നിട്ടില്ലാത്ത ചില വസ്തുതകൾ തുറന്നുവിവരിച്ചിരിക്കുന്നു എന്നതാണ് ഈ കൃതിയുടെ പ്രത്യേകത. ഒളിവുജീവിതം പാർട്ടി എങ്ങനെ നിയന്ത്രിച്ചിരുന്നു എന്ന് ചരിത്രാന്വേഷികൾക്ക് കൗതുകത്തോടെ വായിക്കാം. പാർട്ടിയും അതിന്റെ സാർവദേശീയഘടകങ്ങളും അടിയന്തിരാവസ്ഥക്കാലത്ത് ഇന്ദിരക്ക് പിന്തുണ നൽകിയതിന്റെ പിന്നാമ്പുറങ്ങൾ - ഇന്നവർ ഓർമ്മിക്കാനിഷ്ടപ്പെടാത്ത കഥകളും - ഗ്രന്ഥകർത്താവ് വെളിപ്പെടുത്തുന്നു. എസ്. ഏ. ഡാങ്കെ, പി. സി. ജോഷി, എം. പി. പരമേശ്വരൻ, പി. ഗോവിന്ദപ്പിള്ള, തോമസ് ഐസക്ക്, ഡോ. ഇക്‌ബാൽ എന്നിവർക്കു നേരെയുള്ള നിശിതവിമർശനം പ്രത്യേകശ്രദ്ധ അർഹിക്കുന്നു.
പുസ്തകം ശക്തമായി ശുപാർശ ചെയ്യുന്നു.
Book Review of 'Polichezhuthu' by Berlin Kunjananthan Nair
ISBN: 9788182651708
