പള്ളിയും പാർട്ടിയും കേരളത്തിൽ

കൃസ്തീയസഭ ലോകമെമ്പാടും കമ്യൂണിസ്റ്റ് പാർട്ടികളെ ശക്തിയായി എതിർത്തുപോന്നിരുന്നു. പോളണ്ടിൽ പാർട്ടിയുടെ പതനത്തിന് വേഗം കൂട്ടിയതിൽ ജോൺ പോൾ രണ്ടാമൻ മാർപാപ്പയുടെ പങ്ക് ചെറുതല്ല. വിദ്യയിലും സമ്പത്തിലും ഒരുപോലെ മുന്നിൽ നിൽക്കുന്ന കേരളത്തിലെ കൃസ്ത്യാനികളും പൊതുവെ ഇടതുവിരുദ്ധത ഉയർത്തിപ്പിടിച്ചവരാണ്. റബർ കൃഷി, വിദ്യാഭ്യാസം, ആതുരശുശ്രൂഷ എന്നീ മേഖലകളിൽ കേരളത്തിലെ സഭ വൻതോതിൽ നിക്ഷേപം നടത്തിയിട്ടുണ്ടെന്നുള്ളതുകൊണ്ടുതന്നെ ഈ രംഗങ്ങളിൽ സോഷ്യലിസ്റ്റ് ആശയങ്ങൾ തിരുകിക്കയറ്റുന്നതിന് അവർ എന്നും ശക്തിയുക്തം എതിരുനിന്നു. തിരഞ്ഞെടുപ്പിലൂടെ ലോകത്തിലാദ്യമായി അധികാരത്തിലേറിയ 1957-ലെ കമ്യൂണിസ്റ്റ് സർക്കാരിനെ രണ്ടുവർഷത്തിനുള്ളിൽ ജനാധിപത്യവിരുദ്ധമായ രീതിയിൽ പിരിച്ചുവിടലിലേക്ക് വഴിതെളിച്ച വിമോചനസമരത്തിന്റെ തിരക്കഥയും സംവിധാനവുമെല്ലാം മെത്രാന്മാരുടെ അരമനകളിലായിരുന്നു. എങ്കിലും ഈ നൂറ്റാണ്ടിന്റെ തുടക്കത്തോടെ കൃസ്തീയവിശ്വാസികൾ കമ്യൂണിസ്റ്റുകാരോടുള്ള എതിർപ്പിന്റെ രൂക്ഷത തെല്ലൊന്നു കുറച്ചിട്ടുണ്ട്. ഇതുപക്ഷേ പാർട്ടിയുടെ നയപരിപാടികളിലുണ്ടായ വ്യതിയാനം കൊണ്ടൊന്നുമായിരുന്നില്ല, മറിച്ച് ബി.ജെ.പിയുടെ ശക്തമായ വളർച്ചയിലുണ്ടായ ഭീതി നിമിത്തമായിരുന്നു. കൃസ്തീയസഭയും വിശ്വാസികളും ഒരുവശത്തും കമ്യൂണിസ്റ്റ് പാർട്ടി മറുവശത്തും അണിനിരന്നുകൊണ്ട് അവർക്കിടയിൽ രൂപമെടുത്ത ആദാന-പ്രദാന നടപടികളുടെ ഒരു സംക്ഷിപ്തരൂപമാണ് ഈ പുസ്തകത്തിൽ കാണാൻ കഴിയുന്നത്. ഗ്രന്ഥകാരനായ ശ്രീ. നൈനാൻ കോശി സഭയുമായി അടുത്തുപ്രവർത്തിച്ചിരുന്ന ഒരു കോളേജ് അദ്ധ്യാപകനും, 1999-ൽ മാവേലിക്കര ലോക്‌സഭാ മണ്ഡലത്തിൽ എൽ.ഡി.എഫ്. സ്ഥാനാർത്ഥിയായി മത്സരിച്ചു പരാജയപ്പെട്ട ആളുമാണ്.

മതമേലദ്ധ്യക്ഷന്മാർ രാഷ്ട്രീയത്തിൽ ഇടപെടുന്നതിനെ ലേഖകൻ ന്യായീകരിക്കുന്നത് സഭയെന്ന നിലയിൽ രാഷ്ട്രീയത്തിൽ നേരിട്ടിടപെടേണ്ട സന്ദർഭങ്ങൾ വിശാലമായ സമൂഹത്തിന്റേയും രാഷ്ട്രത്തിന്റെ പൊതുവേയുമുള്ള താല്പര്യങ്ങൾക്കു വേണ്ടിയാകാമെന്നാണ്. നിലവിലുള്ള വ്യവസ്ഥിതിയുമായി ഉറ്റബന്ധം പുലർത്തി വ്യതിയാനങ്ങളെ ശക്തമായി എതിർക്കുന്നതാണ് സഭയുടെ പ്രകൃതം. മാറ്റത്തിനു മാത്രമാണ് മാറ്റമില്ലാത്തത് എന്നു വിശ്വസിക്കുന്ന ഇടതുപക്ഷക്കാർ ഇവിടെ വഴിപിരിയേണ്ടി വരും. കൃസ്തുമതത്തെ ഏറ്റവും വാചാലമായി കേരളത്തിൽ പ്രതിനിധീകരിക്കുന്നത് കത്തോലിക്കാസഭയാണെങ്കിലും സുവ്യക്തമായി, കൃസ്തീയദർശനത്തോടെ രാഷ്ട്രീയത്തിൽ ഇടപെട്ടിട്ടുള്ളത് മാർത്തോമാ സഭ മാത്രമാണെന്നാണ് കോശിയുടെ പക്ഷം. അതിനദ്ദേഹം ഉദാഹരണങ്ങളും നിരത്തുന്നു. പ്രധാനമായും മൂന്നു കാര്യങ്ങളിലാണ് സഭ ഊന്നൽ നൽകേണ്ടതെന്ന് ഗ്രന്ഥകാരൻ വാദിക്കുന്നു - മതനിരപേക്ഷത, സാമ്പത്തികനീതി, ലോകസമാധാനം. അത്ഭുതമെന്നുതന്നെ പറയട്ടെ, സാമൂഹ്യനീതി (social justice) സഭയുടെ ശ്രദ്ധ പോലും അർഹിക്കുന്ന വിഷയമല്ല! നമ്പൂതിരിമാർ മതം മാറി കൃസ്ത്യാനികളായവരാണ് തങ്ങളുടെ പൂർവികർ എന്നഹങ്കരിക്കുന്നവരുടെ മുൻഗണനാപട്ടിക ഇങ്ങനെയായില്ലെങ്കിലേ ആശ്ചര്യത്തിന്നവകാശമുള്ളൂ.

കമ്യൂണിസത്തിന്റെ ആചാര്യനായ കാൾ മാർക്സിനേയും അദ്ദേഹത്തിന്റെ പ്രത്യയശാസ്ത്രത്തേയും കൃസ്തീയവിശ്വാസികൾക്ക് ബോധിക്കത്തക്കവിധത്തിൽ പല മുഖംമൂടികളും കോശി ചാർത്തിക്കൊടുക്കുന്നു. മാർക്സിന്റെ നിരീശ്വരവാദമെന്നത് വിഗ്രഹാരാധനയെ മാത്രം എതിർക്കുന്ന ഒന്നാണെന്നും മാനവികത നശിപ്പിക്കുന്ന മതത്തെ മാത്രമാണ് അത് കടന്നാക്രമിക്കുന്നതെന്നും വാദം പുരോഗമിക്കുന്നു. മാർക്സിന്റെ മതനിഷേധത്തിന്റെ പൊരുൾ ദൈവനിഷേധമല്ല, പ്രത്യുത മനുഷ്യസ്വാതന്ത്ര്യത്തിന്റെ പ്രഖ്യാപനമാണെന്നുള്ള സ്ഥാപിക്കൽ വിശ്വാസികളെ ആശ്വസിപ്പിക്കാൻ പോന്നതാണ്. ഗ്രന്ഥകർത്താവ് നല്ലൊരു സെയിൽസ്മാൻ ആണെന്നു പറയേണ്ടിവരും. യേശു കൃസ്തു ഉയർത്തിക്കാട്ടിയ സ്നേഹത്തിന്റേയും ത്യാഗത്തിന്റേയും മൂല്യങ്ങൾ സാമൂഹ്യപ്രതിബദ്ധതയുടെ അടിസ്ഥാനമാക്കുമ്പോഴേ മതമേധാവികൾ ആനുകാലികമായി പ്രസിദ്ധീകരിക്കുന്ന ഇടയലേഖനങ്ങൾ യഥാർത്ഥ വഴികാട്ടികളാകൂ. വിമോചനസമരം നടന്ന 1957-ലെ ലേഖനങ്ങൾ വെറും സമരാഹ്വാനങ്ങൾ മാത്രമായിരുന്നെന്ന നിരീക്ഷണവുമുണ്ട് ഇക്കൂട്ടത്തിൽ.

കേരളവും സഭയും ചർച്ചാവിഷയമാകുമ്പോൾ വിമോചനസമരം ഒഴിവാക്കപ്പെടാവുന്നതല്ലാത്തതുകൊണ്ടുതന്നെ സാമാന്യം വിശദമായ ഒരു വിവരണം ഉൾക്കൊള്ളിച്ചിരിക്കുന്നു. 2008-ലെ സാമ്പത്തികപ്രതിസന്ധി മുതലാളിത്തത്തിന്റെ തകർച്ചയുടെ ആദ്യസൂചകമാണെന്ന തെറ്റായ ധാരണ നൈനാൻ കോശി വെച്ചുപുലർത്തുന്നു. 1991-ലെ സോവിയറ്റ് യൂണിയന്റെ പതനത്തിനുശേഷം ഒരു നീണ്ട ഞെട്ടലിൽ ആണ്ടുപോയ കമ്യൂണിസ്റ്റ് അനുഭാവികൾക്ക് അല്പമൊരു ജീവൻ വെച്ചത് 2008-ലെ സാമ്പത്തികമാന്ദ്യത്തോടെയാണ്. എന്നാൽ അമേരിക്കയും പാശ്ചാത്യലോകവും സാവധാനത്തിൽ ആ തിരിച്ചടിയെ മറികടന്നതോടെ അവർ വീണ്ടും നിരാശയിലമർന്നു. ആഗോളവൽക്കരണത്തിനെതിരെയും ലേഖകൻ അലറിവിളിക്കുന്നുണ്ട്. പുത്തൻ നയങ്ങളുടെ ഫലമായി ലോകത്തിലെ ഏറ്റവും സമ്പന്നരായ പത്തുവ്യക്തികളുടെ പട്ടികയിൽ രണ്ട് ഇന്ത്യാക്കാരും ഉൾപ്പെട്ടിട്ടുണ്ടെന്നതാണ് കോശിയെ ഏറ്റവുമധികം സങ്കടപ്പെടുത്തുന്നത് (പേജ് 38). ഇന്ത്യ ആണവായുധം നിർമ്മിക്കാൻ പാടില്ല എന്നു വാദിക്കുന്ന ലേഖകൻ നമ്മുടെ അയൽരാജ്യമായ ചൈന വൻതോതിൽ ആണവായുധങ്ങൾ ശേഖരിച്ചുവെച്ചിരിക്കുന്നത് സൗകര്യപൂർവം വിസ്മരിക്കുന്നു. കമ്യൂണിസ്റ്റ് രാജ്യങ്ങൾ ആണവശക്തികളാകുന്നതിൽ കുഴപ്പമില്ലെന്നായിരിക്കും അദ്ദേഹത്തിന്റെ മനോഗതി!

അനായാസവായന സാദ്ധ്യമാക്കുന്ന രീതിയിലല്ല ഈ കൃതിയുടെ രചനാരീതി. ഗ്രന്ഥകാരന്റെ വാദങ്ങൾ മിക്കവയും കൃത്രിമവും ഏച്ചുകെട്ടിയതുമാണ്. കൃസ്തുവിന്റെ ദർശനങ്ങൾ തന്നെയാണ് മാർക്സും പ്രസംഗിച്ചത് എന്നു പറഞ്ഞാൽ ജനം അത് തൊണ്ടതൊടാതെ വിഴുങ്ങുമെന്നാണോ അദ്ദേഹം കരുതിയത്? ബിഷപ്പ് പൗലോസ് മാർ പൗലോസ്, എം. എം. തോമസ് എന്നീ കമ്യൂണിസ്റ്റ് പക്ഷപാതികളായ കൃസ്തീയപണ്ഡിതരുടെ അഭിപ്രായങ്ങൾ ഉടനീളം ഉദ്ധരിക്കുന്നുണ്ടെങ്കിലും പള്ളിക്കും പാർട്ടിക്കും യോജിച്ചുപ്രവർത്തിക്കാൻ യോഗ്യമായ മേഖലകൾ നിർദേശിക്കുന്നതിൽ പുസ്തകം തീർത്തും പരാജയപ്പെടുന്നു.

Book Review of 'Palliyum Partyum Keralathil' by Ninan Koshi
ISBN: 9788126434657